Anëtari i Kryesisë së Partisë Demokratike të Kosovës, Përparim Gruda ka reaguar pas konferencës së Lëvizjes Vetëvendosje në lidhje me rastin e Astrit Deharit.
Gruda ka thënë se në konferencë nuk është përmendur fare djegia e Institutit të Mjekësisë Ligjore dhe humbja e mostrave të Dehait gjatë kohës kur kjo parti është në pushtet.
Sipas tij, kjo është e papranueshme dhe e turpshme, raporton teve1.info
“Pavarësisht se kanë kaluar më shumë se tre vjet në pushtet, gjatë të cilëve nuk është bërë asgjë për të zbardhur rastin Dehari, përkundrazi Instituti i Mjekësisë Ligjore është djegur dy herë, sot LVV vendosi të organizojë një konferencë për media para Prokurorisë Speciale, duke kërkuar drejtësi për Astrit Deharin. A është kjo drejtësia që keni premtuar qytetarëve të Kosovës dhe familjes Dehari? Kjo është e papranueshme dhe e turpshme”, ka shkruar Gruda në Facebook.
Kujtojmë se, në konferencën para Prokurorisë Speciale, anëtari i Lëvizjes Vetëvendosje, Sami Kurteshi, ka implikuar ish-presidentin Hashim Thaçi dhe ish-kryekuvendarin Kadri Veseli, në rastin e vdekjes së Astrit Deharit.
Kurteshi: Kishte urdhër politik nga maja e shtetit për vrasjen e Deharit