Sulmuesi i Kosovës, Vedat Muriqi do të kthehet në futbollin e Turqisë dhe mediumet turke një gjë të tillë po e bëjnë fakt të kryer.
Thuhet se Beshiktashi e Trabzonspori janë në garë të ashpër për Muriqin, të cilit tashmë i kanë bërë ofertë dhe po negociojnë me Mallorcan për lirimin e tij.
Përderisa Beshiktashi po synon blerjen e kartonit të Muriqit, Trabzonspori po insiston në huazimin e tij për një vit me opsionin e blerjes në verën tjetër.
Bëhet e ditur se Muriqi është i gatshëm të kthehet në Turqi pasi tashmë atij i është ofruar kontratë dyvjeçare dhe javën e ardhshme pritet të prezantohet te Beshiktashi apo Trabzonspori.
30-vjeçari e njeh mirë futbollin turk pasi gjatë karrierës ka luajtur për Fenerbahçen dhe ka qenë pjesë e skuadrave si Rizespor, Gençlerbirligi e Giresunspor.
Muriqi ka kontratë me Mallorcan deri në verën e vitit 2027, ndërsa pjesë e ekipit spanjoll është prej vitit 2022 kur iu bashkua nga Lazio.
Në 80 paraqitje në La Liga të Spanjës, Muriqi ka shënuar 27 gola dhe ka bërë 8 asistime me fanellën e Mallorcas.
