Një grua e moshës rreth 40-vjeçare ka vdekur pasi është goditur nga vetura të mërkurën në Ferizaj.
Viktima fillimisht për shkak të lëndimeve të rënda trupore është dërguar në Qendrën Emergjente në Ferizaj, më pas në Qendrën Klinike Universitare të Kosovës, mirëpo nuk ka arritur t’i bëjë ballë lëndimeve të marra.
Lajmin për teve1.info e ka konfirmuar zëdhënësi i Policisë për rajonin e Ferizajt, Kanun Veseli.
Më datën 07.08.2024 rreth orës 15:40 kemi pranuar informatën se në rrugën ” Driton Islami” në Ferizaj ka ndodhur një aksident komunikacioni me lëndime të rënda trupore, e përfshirë një veturë Opel me targa vendore dhe një këmbësor. Drejtuesi i veturës nuk është ndalur në vendin e ngjarjes dhe është larguar në drejtim të panjohur. Për pasojë e këtij aksidenti lëndime të rënda trupore ka pësuar viktima femër e moshës rreth 40 vjeçare, e cila fillimisht për ndihmë mjekësore është dërguar në Qendrën Emergjente në Ferizaj, e më pas për tretman të mëtutjeshëm mjekësor është dërguar në Qendrën Klinike Universitare në Prishtinë. Në ora 19:15 nga Qendra Klinike Universitare e Prishtinës jemi njoftuar se viktima, e cila ishte duke u trajtuar ka ndërruar jetë”, ka thënë Veseli.
Ai ka bërë të ditur se drejtuesi i veturës nuk është ndalur në vendin e ngjarjes dhe është larguar në drejtim të panjohur dhe më pas është paraqitur vet në stacionin e policisë
“Në stacionin e policisë në Ferizaj është paraqitur i dyshuari/drejtuesi i veturës R.M, i moshës 18-vjeçar, që ishte larguar nga vendi i ngjarjes, i cili në prani të avokatit mbrojtës është intervistuar nga hetuesit policorë të Hetimeve të Aksidenteve dhe me vendim të prokurorit të shtetit është ndaluar në mbajtje për 48 orë, për procedura tjera hetimore”, ka thënë Veseli.
