Presidentja e Kosovës, Vjosa Osmani dhe ekipi i saj kanë pasur edhe dy incidente të ngjashme si ai i javës së kaluar në Aeroportin e Shkupit, sipas procesverbaleve të Policisë maqedonase të cilat i ka siguruar “Alsat.mk”.
Dy incidentet e mëhershme të presidentes së Kosovës, Vjosa Osmani në Aeroportin e Shkupit kanë pasur motivet e njëjta, refuzimi për ta kontrolluar bagazhin në skaner.
Sipas procesverbaleve të policisë, të siguruara nga “Alsat”, thonë se në shtator të vitit kaluar është refuzuar kontrolli i bagazheve nga ekipi i presidentes së Kosovës. Arsyet për këtë refuzim i kanë bazuar në imunitetin diplomatik të presidentes.
“Pasi kanë arritur në sektorin VIP mes personit që ka përgjegjësinë e protokollit të delegacionit dhe shërbimi për siguri në aeroport ka ardhur deri tek keqkuptimi sepse të njëjtit duke u thirrur në imunitetin diplomatik të kryetares nuk janë pajtuar që bagazhi personal i presidentes së Kosovës të kontrollohet në skaner”, thuhet në procesverbalin e datës 16.09.2023.
E njëjta situatë si ajo e 1 gushtit të këtij viti është përsëritur edhe më 9 tetor. Ekipi i Osmanit ka pretenduar se falë imunitetit diplomatik, presidentes nuk duhet t’i kontrollohet bagazhi, por “që për veprimet e tilla është informuar se mund të refuzohet nga përgjegjësi i fluturimit”.
“Pasi kanë arritur në sektorin VIP, personit që ka përgjegjësi sigurinë e delegacionit dhe udhëheqjen e protokollit (që atë ditë ishte personi D.M me numër identiteti 5785) i është thënë (nga delegacioni i Kosovës) se nuk pajtohen që bagazhi personal i presidentes së Kosovës të futet në kontroll skaneri. Arsyet për këtë i kanë bazuar në imunitetin diplomatik të kryetares. Nga ana e kapitenit të fluturimit dhe përfaqësuesit të “Croatia Airlines” duke u thirrur në standardet ndërkombëtare dhe programin kombëtar për siguri i është potencuar se derisa nuk lejoj kontrollin e bagazhit, e njëjta nuk do të pranohet në fluturim”, thuhet në procesverbalin e datës 09.10.2023.
Policia maqedonase pati thënë se e ka zbardhur incidentin ku u përfshi Osmani më 1 gusht, duke ngritur kallëzim penal ndaj shefit të sigurimit të kryeparlamentarit të Maqedonisë së Veriut, Afrim Gashi, për “cenim të sigurisë” dhe “pengim ndaj personit zyrtar”.
Kryeministri i Kosovës, Albin Kurti gjatë vizitës së djeshme në Shkup ka thënë se rasti i takon organeve hetuese dhe nuk duhet polemizuar. Ndërkohë kryeministri maqedon Hristijan Mickoski ka thënë se incidenti nuk do t’i prishë raportet mes dy vendeve, por në të kundërtën do t’i afrojë edhe më shumë.
Sot për qëndrimet e tyre ka reaguar kabineti i presidentes së Kosovës, Vjosa Osmani nga ku kanë theksuar se “Presidentja e Kosovës asnjëherë nuk ka kërkuar tejkalim apo shkelje të procedurave, por respektim të rregullave ndërkombëtare, siç bëhet në të gjithë botën”. Sipas kabinetit të Osmanit mënyra se si u trajtua incidenti ndaj Kosovës në Shkup gjatë konferencës së djeshme për media të Kurtit e Mickoskit, është për keqardhje, sepse sipas tyre i ka kontribuar edhe më shumë propagandës kundër Kosovës.
