Prokuroria Themelore në Prishtinë, ka dhënë detaje për të dyshuarin, lidhur me rastin e plagosjes në Fushë Kosovë, i cili ishte recidivist.
Në njoftim thuhet, se me datën 2 gusht në orën 17:30, e ka ndaluar të pandehurin I.A, me dyshimin për dhunë në familje.
Prokuroria ka bërë të ditur se kishte kërkuar caktimin e masës së paraburgimit, por që ishte refuzuar nga Gjykata Themelore në Prishtinë.
“Ju njoftojmë se më datë 04.08.2024, Prokurori i Shtetit ka ngritur Aktakuzë me kërkesë për caktimin e masës së paraburgimit kundër të pandehurit I.A. Po ashtu, më datë 04.08.2024, në Gjykatën Themelore në Prishtinë – dega në Fushë Kosovës, është mbajtur shqyrtimi fillestar në këtë çështje penale, ku Prokurori i Shtetit gjatë kësaj seance, duke marrë parasysh gjendjen shëndetësore të të pandehurit si dhe faktin se i pandehuri ka edhe një adresë tjetër të vendbanimit, ka propozuar masën e arrestit shtëpiak. Gjykata ka refuzuar propozimin e Prokurorit të Shtetit për caktimin e masës së arrestit shtëpiak, ashtu që ndaj të pandehurit I.A, është caktuar masa e ndalimit për t’iu afruar vendit apo personit të caktuar”, thuhet në komunikatën e Prokurorisë.
Në komunikatën bëhet e ditur se për rastin e sotëm Prokurori i Shtetit ka lëshuar Aktvendim mbi ndalim.
Në orët e para të mëngjesit të së martës një grua në fshatin Bresje është plagosur me armë zjarri nga bashkëshorti i saj, i cili ditë më parë ishte ndaluar për dhunë në familje.
Gruaja e plagosur është duke u trajtuar në QKUK./teve1.info/
