Të martën paradite është prezantuar selektori i ri i Kombëtares së Rumanisë. Micrea Lucescu ka zënë vendin e Edi Iordanescut, i cili u largua nga ky post me të përfunduar “Euro 2024” që u mbajt në Gjermani.
Në konferencën e tij të parë për shtyp, Lucescu ka folur për shumë gjëra, përfshirë këtu edhe Ligën e Kombeve, garë që starton muajin e ardhshëm.
Ndeshjen e parë zyrtare si elektor i Rumanisë, Lucescu do ta ketë kundër Kosovës, e cila luhet më 6 shtator në stadiumin “Fadil Vokrri” në Prishtinë dhe i takon Grupit 2 të Ligës C të Ligës së Kombeve.
Lucescu ka thënë se synimi i tij është vendi i parë në grup dhe sigurisht se ndaj Kosovës synon fitore.
79-vjeçari është një trajner i njohur me përvojë, i cili edhe në të shkuarën ka qenë selektor i Rumanisë, ndërsa ka udhëhequr edhe Kombëtaren e Turqisë prej vitit 2017 deri në vitin 2019.
Kryesisht, Lucescu ka punuar nëpër klube të Rumanisë, Italisë, Turqisë, Ukrainës e Rusisë. Ka qenë trajner i skuadrave të njohura si Inter, Galatasaray, Beshiktash, Shakhtar Donetsk, Zenit e Dynamo Kiev.
