Mesfushori i Holandës, Xavi Simons edhe në sezonin e ri do të jetë pjesë e skuadrës së Leipzigut.
Ekipi nga Bundesliga ka bërë të ditur se e ka vazhduar edhe për një vit huazimin e Simonsit nga skuadra e Paris Saint-Germainit.
Për Xavin, ky do të jetë viti i dytë te skuadra e Leipzigut dhe në sezonin 2024/25, ai do ta bartë fanellën me numrin 10.
“RB Leipzigu e ka huazuar 21-vjeçarin nga gjiganti francez Paris Saint-Germaini edhe për një vit”, ka shkruar ndër të tjera ekipi gjerman për t’iu dhënë fund spekulimeve për të ardhmen e Simonsit.
Sezonin e shkuar, Simons pati paraqitje të mira te Leipzigu, ku në 43 ndeshje në të gjitha garat, ai realizoi 10 gola dhe bëri 15 asistime.
Po ashtu, ai luajti mirë edhe në “Euro 2024” për Holandën, kombëtare që arriti deri në gjysmëfinale të këtij turneu.
Simons iu bashkua Parisit në vitin 2019 dhe me skuadrën nga Franca ka kontratë deri në verën e vitit 2027.
