I pari që erdhi ishte Drejtori i Përgjithshëm i Policisë, Gazmend Hoxha.
Bashkë me të, menaxhmenti i Policisë bën përgatitjet e fundit ku edhe pritën krerët e lartë shtetërorë të premten në sallën 1 tetori në Prishtinë.
Po marrin pjesë në ceremoninë e diplomimit të 448 kadetëve të gjeneratës së 60-të në këtë institucion.
Ceremonia nisi me intonimin e himnit kombëtar e një minutë heshtje në nderim të policëve të rënë në krye të detyrës.
Në fjalën e tij, kryeministri Kurti tha se në 25-vjetorin e saj, Policia po shton dhe forcon radhët e saj.
“23 zyrtarët policorë të rënë në krye të detyrës janë dëshmia e shërbimit ndaj vendit dhe qytetarëve, përkushtimit në shërbim dhe e atdhedashurisë pa mbarim. Ata dhanë jetën në patrullime të rregullta, në ndërhyrje ndaj dhunës në familje, në operacione kundër bandave dhe krimit të organizuar, dhe në mbrojtjen e rendit publik e të sovranitetit shtetëror”, tha Kurti.
E ministri i Punëve të Brendshme përmendi rrezikun potencial nga Serbia që siç tha ai aspiron ende territorin e Kosovës.
“Teksa përballemi me sfidat globale të sigurisë ato rëndojnë dyfish mbi supet tona për sa kohë kemi një fqinj agresorë që cenon jetën dhe pronën e qytetarëve tanë ndërsa ende shfaqë politika ekspansioniste e me sjellje destruktive e agresive aspiron territorin tonë”, deklaroi Sveçla.
Derisa drejtori Hoxha u kujtoi atyre se puna policore është mision i shenjtë e fisnik, ku duhet përkushtuar shërbimin ndaj qytetarit, shtetit e shërbimit ndaj organizatës policore.
“Sot ndërsa për herë të parë mbani uniformen policore dhe bëni betimin për t’i shërbyer shtetit të Kosovës duke i zbatuar ligjet e vendit dhe duke mbrojtur ligjshmërinë, rendin dhe sigurinë publike kërkoj nga ju që të zbatoni me nder dhe krenari përgjegjësitë dhe obligimet që vijnë në profesionin dhe detyrat tuaja si polic i Republikës së Kosovës”, ka thënë Drejtori i Përgjithshëm i Policisë së Kosovës, Gazmend Hoxha.
Kjo është gjenerata e dytë që diplomon brenda këtij viti.