448 kadetët e gjeneratës së 60-të nga e premtja e 2 gushtit do t’i shërbejnë qytetarëve të Kosovës pa dallim.
Florian Shala që është edhe zëdhënës i kësaj gjenerate, u zotua se do të punojnë me përkushtim për të ruajtur besimin që e kanë qytetart në këtë institucion.
“Sot zotohemi se do të zbatojmë parimet udhëzuese përmes të cilave udhëheqet Policia e Kosovës ku do të punojmë me përkushtim për të ruajtur besimin që qytetarët kanë në Policinë e Kosovës dhe për të kontribuuar në krijimin e një shoqërie më të sigurtë dhe më të drejtë”, tha Shala.
Kurse Agnis Zeneli thotë se ndjenjat janë të papërshkrueshme në këtë ditë, pasi ka qenë ëndërr e kahmotshme të punojë në Policinë e Kosovës.
“Për mu këto janë ndjenjat më të mira më të veçanta në botë, për mu është nder dhe krenari të diplomoj në këtë ditë se tana herët e kena pasë ëndër si gjithmonë shteti i Kosovës ka pasë nevojë për djem të rinj e policë të rinj, jena rritë në frymën që me i shërby atdheut edhe do t’i shërbejmë deri sa të jemi faleminderit krejtve këtu”, u shpreh Zeneli.
Karakteristika e këtyre kadetëve është se çdo e pesta është grua.
Një nga to shprehet se do të jetë gjithnjë në ndihmë të qytetarëve kurdo që ata kanë nevojë.
“Ëndërra ime ka qenë qysh në fëmijëri që të jem police, ndjenjat janë shumë të mira dhe ndihem krenare për veten time, me nder dhe krenari do t’i shërbejë popullit tim dhe vnedit tim dhe në ndihmë të qytetarëve sa herë që ata kanë nevojë”, deklaroi policja e gjeneratës së 60-të, Elona Halilaj.
Të emocionuar për ta u panë edhe familjarët e këtyre pjesëtarëve të rinj të Policisë.
Një nga to thotë se beson që ata do ta ushtrojnë me nder dhe krenari këtë detyrë që do ta kenë tash e tutje.
“Është nder dhe kënaqësi me qenë në mesin e këtyre djelmoshave dhe vajzave të reja që janë tash në shërbim të qytetarëve të Kosovës po besoj që secili ka me i zbatu detyrat e veta edhe punët e veta dhe kanë me qenë në shërbim të shtetit”, tha familjarja, Fatmire Shabiu.
Për këta zyrtarë u shpërndan certifikatat nga krerët shtetërorë por edhe menaxhmenti i Policisë së Kosovës.