Me dhjetëra zjarrfikës po bëjnë përpjekje të ndalur zjarrin që kishte kapluar këto depo, brenda së cilës ka mjete shkollore, në fshatin Miradi të Fushë Kosovës.
Temperaturat e larta po e bënin edhe më të vështirë punën e tyre për ta parandaluar përhapjen e zjarrit edhe në objektin tjetër.
Mirëpo komandanti i batalionit të zjarrfikësve, Muhamet Reqani, tregon se për momentin kanë arritur ta lokalizojnë zjarrin por që ende nuk është shuar tërësisht.
“Në këtë operacion për ta lokalizuar zjarrin kanë marrë pjesë 24 zjarrfikës dhe për momentin zjarri është i lokalizuar. Deri më tani nuk është asnjë i vdekur dhe asnjë i lënduar, përveç një zjarrfikësi i cili për shkak të punës së lodhshme ka pasur pak probleme shëndetësore, por tani gjendja e tij është shumë e mirë”, tha ai.
Me të kuptuar lajmin për zjarrin e madh, ekipet emergjente kanë dalë në vendin e ngjarjes.
“Kemi qenë dy ekipe ne gatishmëri, dy mjekë edhe katër infermierë. Për momentin nuk është askush i lënduar përveç një pacienti që vetëm nuk po ndjehet mirë por parametrat tregojnë se gjendja e tij është stabile”, u shpreh doktoresha Fitore Ahmeti.
E për këtë ngjarje Policia e Kosovës është informuar rreth orës 12:00.
“Sot rreth orës 12:00, është raportuar se në fshatin Miradi të Fushë Kosovës, një objekt (një punëtori ) është përfshirë nga zjarri. Policia dhe zjarrfikësit menjëherë ka dalë në vendin e ngjarjes. Përveç dëmeve materiale nuk raportohet për persona të lënduar”, tha zëdhënsëja për rajonin e Prishtinës, Flora Ahmeti.
Deri më tani ende nuk dihen shkaktarët e zjarrit dhe demet materiale që i ka shkaktuar.
