Sekretari i përgjithshëm i PSD-së, Nol Nushi i ka parë shqetësuese deklaratat e ministres së Drejtësisë, Albulena Haxhiu lidhur me arratisjet e fundit prej burgjeve të Kosovës.
Nushi e ka vlerësuar si veprim të mirë intervistimin e Haxhiut nga Prokuroria Speciale.
Ai ka thënë se politikanët duhet të kuptojnë përgjegjësinë e fjalës së tyre.
Për Nushin, Haxhiu nuk ka lidhje me juridiksion, ndërsa sipas tij ajo di të bëjë vetëm propagandë.
“Për mua është shqetësuese me dal më thënë ministrja jonë e drejtësisë, kontrolluesja jonë e burgjeve, që Serbia ka dorë në arratisjet prej burgjeve të Kosovës. Shumë mirë që është intervistuar sepse këta duhet më ditë që fjala e tyre si politikanë, si ministra, menaxhojnë me miliona buxhet, nuk mundet këta më lëshuar llafin pa asnjë përgjegjësi. Lidhje me juridiksionin nuk ka Albulena Haxhiu, ajo di të bëjë vetëm propagandë”, është shprehur ai në emisionin “Ditari” në Tëvë 1.
Ndryshe, ministrja Albulena Haxhiu është intervistuar dy ditë radhazi, për siç ka thënë ajo, një deklaratë të saj në një nga emisionet në një televizion, për përpjekjet e prokurorëve apo gjyqtarëve për takime, favore dhe të tjera. Si dhe një reagim të saj në Facebook lidhur me arratisjet nga burgu.
