16-vjeçari, i cili mbeti i plagosur nga arma e zjarrit e një polici në Dubravë të Istogut, ka përfunduar operimin dhe nga Emergjenca është dërguar për trajtim të mëtutjeshëm në Klinikën e Pediatrisë në Qendrën Klinike Universitare të Prishtinës (QKUK).
Ai po trajtohet në njësi intensive dhe gjendja e tij është e rëndë.
Këtë e ka bërë të ditur ShSKUK përmes një komunikate për media.
“QKUK, ju konfirmon se një 16 vjeçar ka ardhur në Klinikën Emergjente, si pasojë e plagosjes me armë zjarri. Të njëjtit i është ofruar fillimisht ndihma emergjente mjekësore, i janë bërë ekzaminimet diagnostike dhe në konsultim me mjekun neurokirug dhe anesteziologu, është futur në sallë të operacionit. Pas operacionit, pacienti është transferuar në Mjekim Intensiv në Klinikën e Pediatrisë!”, thuhet në komunikatë.
Për këtë rast është arrestuar një zyrtar policor, i cili sipas informacioneve të para aksidentalisht e ka plagosur 16 – vjetarin me të cilin ka lidhje familjare.
“Bazuar në hetimet preliminare fillestare dyshohet se rasti ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare. Personi i dyshuar në këtë rast (zyrtari policor) është arrestuar nga Inspektorati Policor me dyshimin se i njëjti ka kryer veprën penale “Vrasje e mbetur në tentativë” kurse me vendim të prokurorit të njëjtit i është caktuar masa e ndalimit për 48 orë si dhe është suspenduar nga detyra”, ka konfirmuar IPK-ja.