Kryeministri i Kosovës, Albin Kurti, ka thënë se që nga ndërhyrja e NATO-s e deri të shpallja e pavarësisë së Kosovës ka qenë ndër miqtë e parë të Kosovës dhe vazhdon të jetë ndër më të mirë.
Kurti kështu është shprehur në ngjarjen e organizuar nga ambasada franceze në Kosovë, me rastin e shënimit të ditës kombëtare të Francës, ku ka falënderuar këtë shtet për mbështetjen.
“Prej ndërhyrjes së NATO-s në 1999, deri në Deklaratën e Pavarësisë në 2008, e deri më sot, Franca ka qenë ndër miqtë e parë të Kosovës dhe vazhdon të jetë ndër më të mirët. Në momentet më të rëndësishme të historisë sonë, si popull dhe si shtet, në raste të gëzimit dhe ato të pikëllimit, juve ju kemi gjetur në krah. Për këtë, kemi qenë, jemi sot, dhe do të jemi përherë, falënderues”, ka thënë Kurti thuhet në komunikatë.
Kurti ka folur edhe për zgjedhjet e 7 korrikut në Francë, ku është shprehur se qytetarët e këtij vendi votuan për Republikën dhe Evropën.
“Vera e vitit 1789 ishte një verë historike, jo vetëm për popullin e Francës, por edhe për të gjithë popujt që duan lirinë dhe demokracinë. Me 14 korrik 1789, një grup revolucionarësh pushtuan burgun e Bastijës, duke shpërfaqur kulmin e pakënaqësisë së tyre ndaj monarkisë, si dhe frymën e re të lirisë dhe barazisë. “Qytetarët e Francës riafirmuan më 7 korrik përkushtimin e tyre ndaj lirisë dhe barazisë, duke votuar bindshëm për Republikën dhe për Evropën. Ndonëse të ndara me mbi dy shekuj në mes vete, viti 1789 dhe viti 2024 janë të lidhur ngushtë me njëri-tjetrin”, ka thënë Kurti ndër të tjera.
