Prokurori i Shtetit ka kërkuar nga Gjykata Themelore në Prishtinë që ndaj personit që kanosi një prokuror të Prokurorisë Themelore në Prishtinë të caktohet masa e paraburgimit.
Kjo është bërë e ditur nga Prokuroria në një përgjigje për Tëvë 1.
“Prokurori i Shtetit ka lëshuar aktvendim mbi ndalimin e personit të dyshuar, për shkak të veprës penale “Kanosja” (ndaj personit zyrtar), më konkretisht ndaj një prokurori të Prokurorisë Themelore në Prishtinë, si dhe për të njëjtin, në Gjykatën Themelore në Prishtinë, ka paraqitur kërkesë për caktimin e masës së paraburgimit”, thuhet nga Prokuroria Themelore në Prishtinë.
Një person është arrestuar të enjten pasi kishte kërcënuar një prokuror në Prokurorinë Themelore të Prishtinës.
Sipas PK-së i arrestuari nuk e kishte liruar zyrën e prokurorit dhe të veshur kishte një jelek antiplumb.
“Është arrestuar i dyshuari mashkull kosovar, pasi që nuk kishte liruar zyrën e prokurorit dhe i njëjti ka kanosur me fjalë ankuesin mashkull kosovar. Gjatë kontrollit trupor i dyshuari kishte të veshur një antiplumb, i cili është sekuestruar”, ka njoftuar Policia e Kosovës.
