Të martën, në këtë tavolinë të bisedimeve do të ulen kryenegociatorët e Kosovës dhe Serbisë.
Me ftese të Bashkimit Evropian, Besnik Bislimi dhe Petar Petkoviqi do të diskutojnë për zbatimin e marrëveshjeve të arritura në kuadër të dialogut.
Zëdhënësi i BE-së, Peter Stano thotë se presin që palët t’i zbatojnë detyrimet që i kanë marrë në këtë drejtim.
“Si pjesë e diskutimeve, palët do të diskutojnë rrugën përpara për zbatimin e Marrëveshjes për rrugën drejt normalizimit, si dhe zbatimin e marrëveshjeve të tjera të dialogut. Siç e kemi thënë shumë herë më parë, të dyja palët pritet të zbatojnë të gjitha detyrimet e tyre përkatëse të Dialogut pa ndonjë vonesë apo parakushte të mëtejshme në mënyrë hap pas hapi”, ka thënë Stano.
E Këshilltari i zëvendëskryeministrit Besnik Bislimit, Klisman Kadiu i përmendi disa tema që priten te jenë në tavolinë për diskutim.
“Tema të diskutimit pritet të jenë ecuria e dialogut, zbatimi i Marrëveshjes Bazike dhe Aneksit të Ohrit si dhe vlerësimi i marrëveshjeve të tjera teknike dhe masa e zbatimit të tyre. Kosova mbetet konstruktive dhe e angazhuar pozitivisht në një proces, i cili përkundër vullnetit tonë, është pasuar me bllokada dhe refuzime të shpeshta nga pala tjetër. Marrëveshjet duhet të zbatohen në plotni e qasja të jetë e barabartë për të dyja palët”, ka thënë Kadiu.
Por nga këto takime nuk pret diçka të re njohësi i çështjeve të politikës, Blerim Canaj.
Madje Canaj thotë se nuk do të ketë asgjë të re në këtë drejtim deri pas zgjedhjeve në Kosovë.
Javën e kaluar në Bruksel kanë dështuar përpjekjet e Bashkimit Evropian për një takim trepalësh me kryeministrin Albin Kurti dhe Presidentin e Serbisë Aleksandër Vuçiq. Shefi për Politikë të
Jashtme dhe Siguri i Bashkimit Evropian, Josep Borrell, fajin e ka hedhur te kryeministri Albin Kurti.
