Gjatë ditës së mërkurë, një aeroplan me udhëtarë nga Prishtina, përmes Beogradit ka udhëtuar për në Gjermani.
Kjo është vërejtur përmes aplikacionit për mbikëqyrjen e fluturimeve, ku teve1.info ka siguruar edhe fotografi.
Lidhur me këtë, Autoriteti i Aviacionit Civil në Kosovë për teve1.info ka thënë se kjo ka ndodhur për shkak të motit të keq, ku më datë 26 qershor ka pasur devijime dhe koordinimi është bërë përmes ACC-së së Tiranës.
Në përgjigje thuhet se këto koordinime mund të bëhen në rastet kur ka ndonjë emergjencë apo kur ka të bëjë me motin e ligë.
“Në rastet të ndonjë emergjence apo kur ka të bëj me motin e ligë siç ka qenë rasti këto ditë, pilotët e mjeteve ajrore mund të koordinohen me kontrollin e trafikut ajror të shteteve fqinje që të devijojnë apo përshtatin rrugën e fluturimit”, thuhet nga ACC.
Hapësira ajrore e Kosovës që nga shtatori i vitit 1999 është pjesë e “Hapësirës së Përbashkët Operacionale të Ballkanit – JOA” të NATO-s, nën kontrollin operacional të Qendrës së Kontrollit të Operimeve të Kombinuara Ajrore 5 (Combined Air Operations Control 5 – CAOC5), e cila në vitin 2014 është transferuar te Qendra Torrejon e Operimeve të Kombinuara Ajrore (Combined Air Operation Centre Torrejon CAOC TJ). Kjo hapësirë ajrore është hapësirë e kontrolluar, në të cilën ofrohen shërbime për trafik ajror./teve1.info/
