Federata e Futbollit e Kosovës (FFK), ka bërë gati ankesën e radhës në UEFA, e cila sërish ka të bëjë me sjelljet me retorikë nacionaliste dhe raciste të tifozëve të Serbisë gjatë ndeshjes së “Euro 2024” kundër Sllovenisë, e cila u luajt në Munchen të mërkurën dhe i takoi Grupit C.
Kjo ndeshje përfundoi 1:1, ndërsa tifozët serb edhe këtë herë shfaqën flamurin serb me hartën e Kosovës, si dhe bënë fyerje shoviniste, sikurse në duelin me Anglinë për çka edhe u dënuan nga UEFA me 14.500 euro.
“FFK dënon fuqimisht thirrjet nacionaliste dhe vendosjen e flamurit serb me hartën e Kosovës e me mbishkrimin ‘S’ka dorëzim’. Përsëritja e sjelljeve të tilla në stadiumet e futbollit, edhe pas dënimeve të mëparshme nga UEFA, është e papranueshme dhe kërkon rigorozitet më të madh nga organet vendimmarrëse të UEFA-së”, ka shkruar FFK në njoftimin e saj.
“Mesazhet me retorikë shoviniste janë skandaloze, bien ndesh me vlerat që përçon sporti dhe minojnë parimet bazë të UEFA-së. I bëjmë thirrje edhe një herë organeve të UEFA-së që të jenë më rigoroze ndaj përsëritjes së mesazheve të tilla armiqësore ndaj vendit tonë, si anëtar i barabartë me të gjitha vendet e tjera në familjen e futbollit evropian”.
Po ashtu, FFK ka kërkuar nga organizatorët të rrisin vigjilencën për të mos lejuar shfaqjen e mesazheve të tilla. FFK ka insistuar se do të vazhdojë të promovojë vlerat e vërteta të futbollit dhe unitetin e respektin ndaj të gjithë të përfshirëve në futboll.
