Ish-deputeti i Lidhjes Demokratike të Kosovës Shkumbin Gashi si dhe Sylë Balaj, janë liruar nga akuza për keqpërdorim të votave në zgjedhjet e 14 shkurtit 2021.
Gjykata i ka shpallur të pafajshëm pasi nuk ështëgjetur se të njëjtit kishin votuar në emër të shtetasve të Kosovës që jetojnë në Austri, me qëllim të sigurimit të votave për të pandehurin, Shkumbin Gashi, atë kohë kandidat për deputet.
“Nuk është provuar se të njëjtit kishihn kryer veprën penale andaj të njëjtit lirohen nga akuza”, ka thënë Musa Konxheli- kryetar i Trupit Gjykues.
Gjyqtari Konxheli lexoi edhe një pjesë të aktakuzës për veprat që i ngarkonte Prokuroria.
“Fillimisht i kanë siguruar kopjet e letërnjoftimeve e 71 qytetarëve të Kosovës që jetojnë në Austri dhe pa dijeninë dhe pëlqimine tyre kundërligjshëm i kanë përdor ato në procesin e votimit për votuesit nga diaspora”, thuhej në aktakuzë.
Të kënaqur me këtë vendim u ndanë edhe avokatët.
“Ekspertiza e Agjencisë së Forenzikes së Kosovës bërë me kërkesë të trupit gjykues ka vërtetuar se fotografitë që Prokuroria Speciale ka përdorur në aktakuzë për të akuzuar të akuzuarit në fakt ka qenë e një vit më herët se sa koha që pretendon PSRK që është kryer vepra penale. I mbrojturi im Shkumbin Gashi ka qenë i akuzuar për një vepër penale që për ne si mbrojtje ka qenë e ditur që nga fillimi se nuk ka asnjë provë”, tha Fatmir Kurmeha, avokat i Shkumbin Gashit.
Të akuzuarit e tjerë kishin arritur marrëveshje me Prokurorinë për pranimin e fajësisë, derisa ndaj njërit prej tyre është veçuar procedura.
