Një tifoz gjerman humbi ndeshjen hapëse të Gjermanisë kundër Skocisë në “Euro 2024” të premten mbrëma, pasi iu thye dora nga topi i goditur nga sulmuesi Nicklas Fullkrug gjatë ngrohej.
Kai Flathmann ishte ulur prapa portës së Gjermanisë kur ai u godit në dorë nga një tentim i Fullkrugut që përfundoi jashtë kornizës, përpara fitores 5:1 kundër Skocisë.
Tifozi gjerman ka postuar një foto të tij në spital më dorën e lidhur dhe ka shkruar se nuk ka fjalë për atë që i ka ndodhur para duelit mes Gjermanisë dhe Skocisë.
Ai ka thënë të ditur se pas këtij incidenti është kontaktuar edhe nga Federata e Futbollit të Gjermanisë, e cila pritet ta ftoj në ndeshjen e radhës.
Tifozi gjerman ka zbuluar se është larguar nga stadiumi me urgjencë gjatë intonimit të himneve, ndërsa ka thënë se i vjen keq që nuk ka arritur ta shoh triumfin e thellë të Gjermanisë. Njërin prej golave të Gjermanisë ndaj Skocisë, e ka shënuar pikërisht sulmuesi Fullkrug.
