Në mbrëmje edhe zyrtarisht bëhet hapja e Kampionatit Evropian të futbollit, i cili për një muaj do të mbahet në Gjermani.
Në ditën e parë të këtij turneu do të zhvillohet vetëm një ndeshje dhe atë në orën 21:00, ku Gjermania si nikoqire do të përballet me Skocinë në kuadër të Grupit A, të cilin e përbëjnë edhe Zvicra e Hungaria.
Dueli mes Gjermanisë dhe Skocisë do të luhet në stadiumin “Allianz Arena” të Munchenit, në të cilin do të mbahet edhe ceremonia hapëse e “Euro 2024”.
Kjo ceremoni që pritet të jetë madhështore do të nis në orën 20:30, ku krahas këngës dhe vallëzimit, do të ketë edhe homazhe për nder të legjendës së Gjermanisë, Franz Beckenbauer që ndërroi jetë në fillim të këtij viti.
Me ndeshjen Gjermani – Skoci, do të nis edhe spektakli në fushë që do të zgjasë deri më 14 korrik kur do të luhet finalja e madhe në Berlin.
Gjermania vlerësohet favorit përball Skocisë, ndërsa dueli tjetër i këtij grupi, ai ndërmjet Hungarisë dhe Zvicrës do të luhet të shtunën prej orës 15:00. Pjesë e Zvicrës janë edhe shqiptarët Granit Xhaka, Xherdan Shaqiri e Ardon Jashari.