Ish-sulmuesi i Kombëtares së Shqipërisë, Erjon Bogdani ka insistuar se Italia nuk do ta ketë aspak të lehtë përballjen me “kuqezinjtë” në Kampionatin Evropian.
Shqipëria dhe Italia përballen në ndeshjen e parë të Grupit B në “Euro 2024”, e cila luhet të shtunën prej orës 21:00 në Dortmund.
Sipas Bogdanit, presioni do të jetë mbi Italinë për shkak se është kampione në fuqi e Evropës.
“Në futboll gjithçka është e mundur dhe mbi të gjitha, fakti që Shqipëria futet si autsajdere përball Italisë ka përparësitë e veta. Presioni është mbi Italinë, e cila nuk do ta ketë aspak të lehtë duelin me Shqipërinë, pasi më shumë se gjysmë e lojtarëve luajnë apo kanë luajtur në Serie A”, është shprehur Bogdani.
Bogdani ka 47 paraqitje dhe 18 gola, ndërsa në nivel klubesh karrierë kryesisht ka bërë në futbollin italian.