Fondi i Kosovës për Efiçiencë të Energjisë (FKEE) njofton se nesër më 14 qershor fillon shqyrtimin e listës së pritjes për aplikantët që kanë shprehur interesimin vitin e kaluar për të përfituar nga subvencionimi i investimeve për implementim të masave të energjisë efiçiente në shtëpitë individuale.
Në njoftim thuhet se në mënyrë që procesi të jetë sa më i shpejtë, efikas dhe transparent, njoftohen të gjithë aplikantët në listën e pritjes të kontrollojnë postën e tyre elektronike në të cilën më 14 qershor 2024, do të pranojnë njoftimin dhe kërkesën që të shprehin interesimin e tyre për të vazhduar tutje me procesin.
“Njëkohësisht, njoftohet se mungesa e ndonjërës nga informatat e kërkuara në email, do të rezultojë me diskualifikim të kërkesës për trajtim të mëtutjeshëm. FKEE pret konfirmime nga të gjithë aplikantët e listës së pritjes, nga e premtja e datës 14 qershor 2024 deri të dielën e datës 23 qershor 2024, thuhet në njoftimin e Fondit të Kosovës për Efiçiencë të Energjisë”.
Ndryshe, thirrja fillestare për përfitim nga subvencionimi i mundësuar nga BE dhe Qeveria e Kosovës, ka qenë aktive nga 8 gusht 2023-25 shtator 2023.
