Temperaturat e larta e nxehti i madh, nuk i ndali të mblidhen në sheshin e qytetit.
Qytetarët e Ferizajt bashkë me përfaqësues institucionesh u mblodhën në 25-vjetorin e çlirimit të vendit.
Me intonimin e himnit kombëtar, filloi edhe ceremonia e zbulimit të shtatores së ish-kryeministrit britanik, Tony Blair në kohën kur u çlirua vendi.
“Do të doja t’i kërkoja falje ish-kryeministrit Tony Blair për vonesën në ngritjen e shtatores së tij të merituar tek 25 vite pas laftus apo 15 vite pas shtatores së presidentit Bill Clinton e cila do duhej të ishte të paktën në vitin 2000” , tha Bashkim Fazliu nga fondacioni “Ne kujtojmë Tony Blairin”.
Ani pse nuk ishte prezent, Blair u dërgoi një mesazh të pranishmëve.
“Njëkohësisht edhe shumë i pikëlluar që nuk është sot këtu por se është i vendosur të ju vizitojë përsëri në të ardhmen”, tha ambasadori britanik në Kosovë.
E i pari i Komunës, Agim Aliu tha se qytetarët ferizajas dhe i gjithë populli do të jenë falënderues ndaj tij.
“Dy burrështetas krerë të fuqive botërore kishte aleatë Kosova e gadishullit ilirik, Bill Clinton e Tony Blair, të paharrueshmit e meritplotët e lirisë së Kosovës”, tha Aliu.
Në emër të UÇK-së, ish-gjenerali Agim Çeku tha se Ferizajt po i shtohet shtatorja e një miku të madh të vendit.
“Kjo shtatore bart në vete reflekton vetëm një mesazh dhe ai është faleminderit Tony Blari falemidnerit për çdo gjë që ë bëre për ne dhe pavarësinë e Kosovës, kontributi juaj vendosmëria juaj ishin vendimtare jo vetëm për fillimin e sulmit mbi caqet serbe por edhe për sigurinë e lirisë së paqes sonë”, tha Çeku.
Kurse, kreu i PDK-së, Memli Krasniqi tha se me këtë, qytetarët po e nderojnë një hero të tyre.
“Vërtetë edhe në rrëfimet e tij personale tregon se ka qenë i mishëruar me vuajtjet tona si popull ndjenjën tonë dhe ka qenë mbështetës i sinqertë për kauzën për lirinë e popullit tonë”, u shpreh Krasniqi.
Pas fjalimeve, u bë edhe zbulimi i shtatores.
Ky manifestim u shoqërua edhe me një program kulturo-artistik dhe këngë kushtuar UÇK-së.