“Trepça Sh.A.” ka njoftuar se ka nisur procedurat bashkë me Agjencinë Kadastrale të Kosovës mbledhjen e dokumentacioneve për siguruar dëshmi për pronësinë e tokave dhe kthimin e tyre që shfrytëzohen nga palë të tjera.
Në një komunikatë për media, “Trepça Sh.A”, u ka bërë thirrje të gjitha subjekteve juridike dhe fizike që kanë në shfrytëzim pronat e kësaj ndërmarrje të lajmërohen deri më 10 korrik.
“Kërkojmë nga të gjitha subjektet juridike dhe fizike, organizatat e shoqërisë civile dhe të gjitha subjektet tjera që me apo pa dijeni janë duke i shfrytëzuar pronat e paluajtshme të “Trepça Sh.A.”, që në afatin 30 ditor (deri më 10.07.2024) të na kontaktojnë në zyrat tona në objektin e menaxhmentit (Parku industrial në Mitrovicë). Bashkëpunimi i juaj do të na kursen kohën dhe shkurton procedurat gjyqësore deri në realizimin e të drejtës sonë”, thuhet në komunikatë.
Nga kjo kompani kanë thënë se po punohet në rishikimin e infrastrukturës ligjore e cila synon një zhvillim të qëndrueshëm ekonomik përmes hapjes së rrugës për investime, rritjen e vlerës së aseteve dhe avancimin e kapitalit tekniko-teknologjik si parakusht për rivitalizimin e Trepçës.
Ndërsa, pronat e kthyera synohet të jenë në shfrytëzim të ndërmarrjes.
“Të gjitha këto prona do t’i kthehen në shfrytëzim ndërmarrjes, me ç’rast disa prej tyre do t’i lëshojmë me qira e disa do t’i përdorim për zhvillimin e kapaciteteve të reja”, thuhet në komunikatë.
