Mbrojtësi i Kombëtares së Shqipërisë, Arlind Ajeti të martën ka folur në konferencën për shtyp para ndeshjes së parë në “Euro 2024”.
Shqipëria, rrugëtimin në Evropian e nis të shtunën mbrëma kundër Italisë, ndeshje kjo që zhvillohet në kuadër të Grupit B, të cilin e përbëjnë edhe Kroacia e Spanja.
Të trija përballjet e fazës së grupeve, Ajeti i ka vlerësuar si finale kurse ka insistuar se Shqipëria mund të bëjë diçka të veçantë në Evropianin e saj të dytë.
Pavarësisht kundërshtarëve të fortë në grup, Ajeti ka thënë se Shqipëria ka cilësi dhe ka insistuar se të gjithë lojtarët janë të vendosur për të dhënë maksimumin nga vetja.
Sa i përket duelit me Italinë, Ajeti ka pranuar se shpreson në një rezultat pozitiv, ndërsa një qasje të tillë ka paralajmëruar se do ta kenë edhe ndaj Kroacisë e Spanjës. Po ashtu, shtoi se llogaritë nuk i kanë bërë por do të shkojnë ndeshje pas ndeshjeje për të siguruar kalimin nga faza e grupeve.
Sikurse për Shqipërinë, edhe për Ajetin “Euro 2024” do të jetë paraqitja e dytë në këtë ngjarje pas asaj të vitit 2016.
Në “Euro 2016” Shqipëria nuk avancoi nga faza e grupeve, të cilën e mbylli me një fitore e dy humbje në tri ndeshje të luajtura.
Duelin kundër Italisë, Shqipëria do ta luaj në qytetin e Dortmundit, për të vazhduar në Hamburg ndaj Kroacisë dhe Duseldorf me Spanjën.
Ndeshja Kroaci – Shqipëri do të luhet më 19 qershor, ndërsa Shqipëri – Spanjë me 24 qershor.
Në të gjitha ndeshjet e grupit, Ajeti pret përkrahje të madhe nga tifozët shqiptarë, të cilët do të jenë në numër të madh në Gjermani.