Mundësi amerikan nga Iowa, Cason Fitch është shpallur më i miri në turneun e pestë ndërkombëtar “Trofeu i Paqes” të mbajtur të hënën në Han të Elezit.
Ky turne është mbajtur nën patronatin e Federatës së Mundjes të Kosovës, si dhe nën mbështetjen teknike të klubit “Dardania” nga Hani i Elezit.
Turneu ndërkombëtar “Trofeu i Paqes” pati pjesëmarrje masive të garuesve dhe zgjati deri në orët e vona të së hënës. Morën pjesë hiq më pak se 138 garues nga vende të ndryshme, përfshirë këtu edhe nga Iowa e SHBA-së.
Pati edhe garues nga Kosova, Shqipëria, Maqedonia e Veriut, Bullgaria dhe Franca, ndërsa edhe numri i të interesuarve për ta përcjell këtë turne ndërkombëtar ishte shumë i madh.
Pas shumë luftërave të zhvilluara, epiteti i mundësit më të mirë i takoi amerikanit Cason Fitch, ndërsa tekniku më i mirë i turneut u shpall Denis Naim nga Bullgaria.
Sa i përket plasmanit ekipor, Maqedonia e Veriut u rendit e para duke e lënë Kosovën në vendin e dytë kurse në vendin e tretë ishte ekipi i Iowas.
Këtë turne nga afër e përcolli edhe kryetari i Komunës së Hanit të Elezit, Mehmet Ballazhi, pastaj kreut i Komitetit Olimpik të Kosovës, Ismet Krasniqi si dhe mysafirë të tjerë vendor e të huaj që e madhështuan edhe më shumë ngjarjen ndërkombëtare.
