Prishtina 01 dhe Liqeni, do ta luajnë sot ndeshjen e dytë të serisë finale në Superligën e Kosovës në futsall.
Kjo përballje nis në orën 20:00 dhe luhet në palestrën “Hysni Jetullahu” në Drenas. Prishtina 01 është kampione në fuqi dhe po avancon 1:0 në këtë seri pasi e mposhti Liqenin në ndeshjen e parë të luajtur javën e shkuar në kryeqytet.
Prishtinës 01 i nevojitet edhe një fitore për ta mbrojtur titullin e kampionit, të cilën mund ta arrij në duelin e dytë ndaj Liqenit.
Në anën tjetër, nëse Liqeni fiton, atëherë seria barazohet dhe gjithçka do të vendoset në ndeshjen e tretë që do të luhet në Prishtinë.
Prishtina 01 ka dominuar këtë edicion në futbollin e sallës, pasi më herët ka mbrojtur Kupën e Kosovës, ndërsa tani po e kërkon edhe titullin e kampionit për të siguruar paraqitjen në Ligën e Kampionëve për sezonin e ri.