Helmetat dhe jelekët ishin të gatshme.
Edhe veglat e punës për hedhjen e materialit ishin aty.
Por asnjëra nga këto nuk u përdorën.
Kësisoj, as kryeministri Albin Kurti e ministrja e Arsimit, Arbërie Nagavci nuk ishin të pranishëm.
Kjo, pasi ceremonia për vendosjen e gurthemelit të shkollës së mesme ekonomike “Isa Boletini” në Podujevë dështoi të mbahej.
Kjo pas një ankese në Gjykatën Komerciale të një operatori ekonomik.
Sipas përfaqësuesve të komunës, Gjykata e bëri njoftimin për pezullim të punimeve të premten pas orarit të punës.
Detaje dha Drejtori i Arsimit në komunën e Podujevës, Avni Fetahu.
“Është nënshkruar një kontratë me datë 27 maj dhe me datën 30 maj Gjykata Komerciale, paska marrë një vendim të cilin vendim ne si komunë e Podujevës nuk e kemi pranuar deri në ditën e djeshme pas orarit të punës. Përkatësisht edhe atë vendim siç jam i njoftuar, është pranuar prej operatorit ekonomik që është ankuar në Gjykatë Komerciale”, ka deklaruar ai.
E kryeministri u njoftua në ditën që do mbahej ceremonia.
“E kemi njoftuar sot Kryeministrin për arsyeje se deri në ditën e sotme ne nuk e kemi pas, të qartë sepse nuk na ka ardhë zyrtarisht nga Gjykata Komerciale, mirëpo na ka ardhë vetëm nga operatori ekonomik” .
Drejtori i Arsimit në këtë komunë bëri të ditur se projekti ka kaluar nëpër të gjitha fazat dhe se vendimi i fundit ka qenë nga organi shqyrtues së Prokurimit dhe se komuna e ka respektuar vendimin final ku është lidhur kontrata.
