Ka dështuar ceremonia për vendosjen e gurëthemelit të Shkollës së Mesme Ekonomike “Isa Boletini” në Podujevë.
Drejtori i Arsimit në këtë komunë, Avni Fetahu, ka bërë të ditur se arsyeja e dështimit lidhet me ankesën e një operatori ekonomik.
Ndërkohë, Fetahu ka thënë se si komunë nuk janë njoftuar me kohë, por kanë marrë përgjigje nga Gjykata Komerciale dje pas orarit të punës.
“U anulua ky aktivitet shumë i rëndësishëm për komunën tonë, ku është nënshkruar një kontratë më datë 27 maj dhe më datë 30 maj Gjykata Komerciale paska marrë një vendim, vendim të cilin ne si komunë nuk e kemi pranuar deri në ditën e djeshme pas orarit të punës. Përkatësisht edhe atë vendim siç jam i njoftuar është pranuar prej një operatori ekonomik që është ankuar në Gjykatë Komerciale, kështu që ne jemi njoftuar shumë vonë për njoftim dhe për të mos ra keq e kem anuluar këtë vendim deri pas tri jave kur do të shqyrtohet vendimi i Gjykatës Komerciale”, tha ai para gazetarëve.
Në këtë ceremoni ishte paraparë që përveç Kurtit të marrë pjesë edhe kryetari i Podujevës, Shpejtim Bulliqi dhe ministrja e Arsimit, Shkencës, Teknologjisë dhe Inovacionit, Arbërie Nagavci.
Vënia e këtij gurthemelit ishte paraparë të nis nga ora 11:00 në kompleksin e shkollave të mesme, “Aleksandër Xhuvani” dhe “Fan S. Noli”./teve1.info/
