Pas dy orësh intervistim, është liruar bashkëshortja e Millan Radojiciq, Ema Radojiciq.
Me kërkesë të Policisë, Departamenti për Krime të Rënda, Ema Radojiciq është intervistuar të enjten në stacionin e policisë në Veri.
Tëvë1 ka mësuar ekskluzivisht, se ajo është intervistuar rreth pasurisë së bashkëshortit të saj, Millan Radojiciq, të cilit i janë sekuestruar Villa ne Ujman, banesa dhe një lokal në veri të Mitrovicës.
Pas intervistimit, ajo është liruar, këtë e ka konfirmuar, zëvendësdrejtori i Policisë për rajonin e veriut, Veton Elshani.
“Konfirmojmë se në Mitrovicë, Veri, është intervistuar ky person në prani të avokatit me ftesë të Krimeve Ekonomike në Prishtinë. Pas intervistimit ajo është liruar”.
Ndryshe, pas sulmit më 24 shtator në Banjskë të Zveçanit, ku Millan Radojiciq me grupin e tij paraushtarak serb sulmuan policinë e Kosovës, Ema Radojiciq është larguar nga veriu i Kosovës.
Millan Radojiciq e ka marrë përgjegjësinë e sulmit në Banjskë, ku mbeti i vrarë rreshteri i policisë, Afrim Bunjaku.