Në një deklarim të përbashkët për disa medie, pas takimit, presidentja Osmani tha se dhe kjo vizitë dërgon mesazh dhe tregon përkushtimin e ShBA-së për rajonin tonë.
“Si aleati ynë më i madh e i zëshëm, ShBA-ja luan rol në rajonin tonë, në Kosovë, dhe e mirëpresim këtë angazhim. Rendi e siguria është nën kërcënim. I informova mysafirët nga senati për rolin që Serbia dëshiron ta luajë në rajonin tonë. Ne bashkërisht do t’i ndalojmë këto ndikime malinje, sepse është vullnet i popullit të Kosovës”, ka thënë Osmani.
“Kur punojmë së bashku me ShBA mund të arrijmë gjithçka. Jemi me fat që vazhdojmë të kemi mbështetjen e secilës administratë amerikane. Përkushtimi ynë është kyç për të nderuar mbështetjen nga ShBA-ja. Fola për synimin tonë hapat drejt integrimit euroatlantik. Rruga e Kosovës është e qartë dhe kam besim se do të kemi mbështetjen e plotë të ShBA-së”, ka shtuar më tej ajo.
Senatorja amerikane, Jeanne Shaheen, tha se është e rëndësishme ta tregojnë mbështetjen e tyre që kanë për Kosovën.
Tutje, ajo theksoi se mirëpresin aspiratat e Kosovës për të qenë pjesë e NATO-s.
“Më vjen mirë që jam kthyer këtu me miqtë tanë. Jemi delegacion dypartiakë. Ne shërbejmë në komisione që janë të rëndësishme për Kosovën dhe politikë të jashtme. Është e rëndësishme të tregojmë mbështetjen tonë për Kosovën. Sot vizituam kampin ‘Bondsteel’ dhe çmojmë përkushtimin e Kosovës. Vlerësojmë historinë dhe përkujtimin tuaj për sekretaren e Albright. Edhe në SHBA do të na mungojë ajo”, është shprehur Shaheen.
“Këtu jemi si pjesë e miqësisë që kanë ShBA-ja dhe Kosova. Mirëpresim aspiratat e Kosovës për të qenë pjesë e NATO-s. Ne jemi pjesë e grupit punues për NATO-n. Gjithashtu dëshiroj të shpreh përkrahjen për të lëvizur drejt BE-së. I ndajmë shqetësimet tuaja për rajonin. Mirëpresim mundësinë për të bashkëpunuar më tej. Mirëpresim mundësinë për të vazhduar marrëdhëniet tona të punës”, ka thënë ajo./EO
