Presidentja e vendit është deklaruar edhe një herë për raportet me kryeministrin, Albin Kurti, duke thënë se kur vendoset interesi shtetëror çdo dallim është i tejkalueshëm.
Osmani ka vlerësuar se është koha që të gjitha institucionet, partitë, bashkërisht të diskutojnë për çështjet e interesit nacional.
E para e vendit, më tej është shprehur se e ka detyrë ta mbrojë Kushtetutën.
“Nuk ka luftë politike, si president luftoj vetëm për një gjë, kushtetutshmërinë. Kur vendoset interesi shtetëror çdo dallim është i tejkalueshëm. Cili ka qenë dallimi dihet. Tash është e domosdoshme që të gjitha institucionet, partitë, bashkërisht të ulemi dhe të diskojmë për çështjet e interesit nacional. Këto tema nuk janë detaje të parëndësishme, gjithë e duam Kosovën, kur ulemi së bashku dhe vendosim së bashku, domosdoshmërisht rezultati do jetë i mirë…Përtej dëshirës dhe vullnetit e kam edhe detyrë kushtetuese ta mbroj Kushtetutën”, tha ajo në një adresim për media.
Në anën tjetër, edhe kryeministri i Kosovës, Albin Kurti i pyetur për raportet me presidenten Vjosa Osmani, ka thënë në raste kanë pasur dallime, por që nuk beson se ato janë të patejkalueshme.
“Ne kemi bashkëpunim të ngushtë. Kjo nuk do të thotë që edhe me kryeparlamentarin Konjufca, edhe me ministren e Jashtme, Gërvalla, edhe me presidenten Osmani nuk kemi pasur diskutime, nganjëherë dallime, por unë nuk besoj që ka të tilla të cilat janë të patejkalueshme apo..”, tha Kurti të martën para medieve. /teve1.info/
