Autoritetet serbe njoftuan të shtunën se e kanë arrestuar Tefik Mustafën në pikën kufitare që lidh Serbinë me Kosovën, nën dyshimin për “krime lufte”.
Djali i tij, Qamil Mustafa ka deklaruar se babai i tij i cili tani është paraburgim është në gjendje të mirë shëndetësore.
Ai ka njoftuar se kanë angazhuar një avokat i cili edhe e ka përfaqësuar në seancën e djeshme.
Më tej Mustafa ka bërë me dije se nesër babait të tij për vizitë do t’i shkojë ambasadori i Kosovës në Serbi, Jetish Jashari.
“Kemi pasur kontakte të drejtpërdrejta dhe çdo herë kemi pasur me ambasadorin dhe zyrën ndërlidhëse të Kosovës në Beograd. Na kanë trajtuar në mënyrën më të mirë, të gjitha informacionet na kanë dhënë. Ne e kemi marr edhe një avokat për mbrojtjen e babait, e ka përfaqësuar edhe dje në seancë. Për ditën e djeshme nuk ka dhënë asnjë informacion. Sot avokati e ka vizituar babën dhe thotë se mirë është më shëndet, pak ka problem me tension. Avokati është nga Serbia. Nesër si duket ambasadori Jetishi më ka thënë se do t’i shkojë në vizitë. Është i paraburgosur në një dhomë vetëm”, është shprehur ai në emisionin “Ditari” në TËVË 1.
Ndërsa, ai ka mohuar akuzat që po i ngarkohen babai të tij, duke thënë se e kanë lënë drejtësinë të merret me çështjen
Akuza që po i bëhet babait tim nuk është e vërtetë. Ai prej gushtit të vitit 1999 nuk është në Kosovë dhe deri në vitin 2004 nuk është kthyer në Kosovë. Po i veshet një akuzë që nuk është reale. Ne po ia lëmë shtetit që të merret me këtë çështje”, ka shtuar ai. /teve1.info/
