Trajneri i Kombëtares së Kosovës në futboll, Franco Foda ka konfirmuar se synon ta mposht Norvegjinë në miqësoren e këtij muaji.
Foda ka thënë se ekipi është përgatitur mirë gjatë këtij grumbullimi dhe në fushë do të futet për ta fituar ndeshjen, ndonëse ka pranuar se nuk do të jetë lehtë.
Kosova do të përballet me Norvegjinë të mërkurën prej orës 19:00 në Oslo, në miqësoren e vetme të këtij muaji. Foda shtoi se gjithë futbollistët janë në gjendje të mirë, por nuk dha shumë detaje për formacionin me të cilin do të paraqitet kundër Norvegjisë.
Sigurisht, ai ka thënë se i vjen keq që nuk këtë grumbullim me ekipin nuk kanë mundur të bashkohen Milot Rashica e Florent Muslija për shkak të lëndimit por ka shtuar se ka besim të madh në pjesën tjetër të lojtarëve.
Foda zbuloi se maksimalisht është munduar ta bëjë gati ekipin në këtë grumbullim duke munduar që ekipit t’ia instaloj sistemin e lojës që dëshiron të luaj. Ai ka thënë se dëshiron më të mirën ndaj një kundërshtari të fortë si Norvegjia, që ka lojtarë si Erling Haaland e Martin Odegaard.
Ka pranuar se dëshira e tij është ta fitoj këtë miqësore, por ka shtuar se me e rëndësishme është mënyra se si do të paraqitet Kosova në fushë. Përkrah trajnerit Foda në konferencën për shtyp është paraqitur edhe mesfushori Valon Berisha, i cili ka pranuar forcën e Norvegjisë por ka shtuar se Kosova do të përpiqet të bëjë lojën e saj dhe sigurisht se do ta kërkoj fitoren në këtë miqësore.
Pas konferencës, Kosova ka mbajtur stërvitjen e parë dhe të fundit në Oslo para duelit me Norvgjinë. “Dardanët” të hënën pasdite kanë ateruar në Oslo kurse prej fillimit të grumbullimit kanë stërvitur në kampin nacional të FFK-së në Hajvali.