Shtëpinë e ka brenda zonës ushtarake të Forcës së Sigurisë së Kosovës.
E toka që sot shfrytëzohet si poligon ushtarak, Mehmet Meta thotë se i ka takuar atij.
Madje banori i fshatit Babaj i Bokës në Gjakovë tregon se edhe mali iu shpronësua.
Por, Meta nuk është i kënaqur me mënyrën e shpronësimit, andaj kërkon të rishikohet i tërë ky proces.
Prandaj ai kërkoi përmes Gjykatës ndaljen e ndërprerjen e shpronësimit.
“Shpronësu tokën na kanë, bile bash mu, unë jam në gjykatë me ta. Që nuk pranoj pra qysh ma kanë marrë tokën ata, nuk pranoj me dhanë qashtu dhe nuk di, prandaj as paret. Derisa të merr përfundimi që nuk ka ku me shku ma anej. Në gjyq jam me ta se 22 tokë m’i kanë shpenzu, ujt e kem, bash për tyrbe ujt, që është vlera më e madhja që është ujt e pijshëm, e i kam qitë n’gjykatë mos me na marrë ujt”, thotë ai për Tëvë1.
I njëjti kërkoi caktimin e masës së sigurisë.
Kjo për të ndaluar kryerjen e çdo aktiviteti në këtë zonë dhe shfrytëzimin e parcelave deri në zgjidhjen gjyqësore të kësaj çështjeje.
Por nga Gjykata Themelore në Gjakovë bëjnë të ditur se ky propozim është hedhur poshtë.
“Gjykata Themelore në Gjakovë, me datën 27 dhjetor 2023, me aktvendim e ka refuzuar si të pa bazuar propozimin për caktimin e masës së sigurisë, i paraqitur nga propozuesit përmes përfaqësuesit të tyre, me arsyetimin se propozuesit nuk e kanë bërë të besueshëm ekzistimin e të drejtës së tyre subjektive siç parashihet me nenin 297 paragrafi 1, pika a) dhe kanë dështuar të provojnë plotësimin e kushtit të dytë që ka të bëjë me rrezikun siç parashihet me nenin 297 paragrafi 1, pika b) të Ligjit të Procedurës Kontestimore”, thuhet nga gjykata.
Ndaj vendimit të Gjykatës Themelore në Gjakovë, për refuzimin e masës së sigurisë, Mehmet Meta ka parashtruar ankesë në Gjykatën e Apelit të Kosovës, e cila poashtu ka refuzuar ankesën e tij.
E ankesa sipas Gjykatës ka të bëjë me rivlerësimin e 24 paluajtshmërive të shpronësuara, ndërsa ndaj 4 paluajtshmërive të tjera është kërkuar ndalja-ndërprerja e shpronësimi.
Qeveria e Kosovës ka shpronësuar për interes publik pronat e paluajtshme të pronarëve dhe zotuesve të interesit të cilat preken nga ndërtimi i ‘’Poligonit Kryesor të Trajnimeve’’ për nevoja të FSK-së në zonat kadastrale të Babaj i Bokës, Shishman i Bokës, Popoc, Ponoshec, Çerret dhe Devë të Komunës së Gjakovës.
Në lidhje me ankesën konkrete të Metës, televizioni ka kërkuar sqarime nga ekzekutivi por që deri në publikimin e kronikës nuk ka marrë përgjigje.
