Të shtunën Tefik Mustafa, derisa ishte duke udhëtuar me autobus për në njërin prej vendeve të Evropës, u arrestua nga policia serbe nën pretendimin se ka kryer krime lufte.
“Sot pasdite, në pikën administrative të kalimit në Merdare, u arrestua një person, i dyshuar për krime lufte kundër civilëve në Kosovë dhe Dukagjin. Fjala është për Tefik Mustafën, i cili, si pjesëtar i UÇK-së, përmendet në deklaratat e dëshmitarëve si pjesëmarrës në rrëmbimin e policëve Goran Marinkoviq, Zhivojin Paviq dhe Predrag Millosheviq, që ka ndodhur më 19 qershor 1999 në rrugën magjistrale Prishtinë – Gjilan, te vendi Labanj, pas së cilës atyre u humbën të gjitha gjurmët. Personi do t’i dorëzohet Prokurorisë për Krime Lufte”, ka thënë ministri serb Daçiq.
Për këtë rast, sekretari i Zyrës Ndërlidhëse të Kosovës në Beograd, Fatmir Haxholli, tha se Serbisë “me gjasë po i duhet ndonjë temë propagandistike për zgjedhjet e nesërme në Serbi”, duke iu referuar zgjedhjeve lokale që po mbahen sot në Serbi.
E Ministria e Punëve të Jashtme kërkoi lirimin e menjëhershëm të Mustafës duke e dënuar ashpër këtë veprim të Serbisë.
“Ministria e Punëve të Jashtme dhe Diasporës dënon ashpër ndalimin, arrestimin dhe keqtrajtimin e qytetarëve të Republikës së Kosovës dhe njëkohësisht i bën thirrje Bashkësisë Ndërkombëtare që të ndërmarrë hapa konkret për lirimin e menjëhershëm të qytetarit z. Tefik Mustafa dhe njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut. MPJD për këtë arrestim ka njoftuar dhe shtetet e Kuint-it në Kosovë dhe do t’iu mbajë të informuar rreth këtij rasti dhe për çdo informatë të re do t’ju njoftojmë me kohë, thuhet nga MPJD.
Lidhur me ketë rast Tëvë1 ka kontaktuar edhe me djalin e Tefik Mustafës, Qamilin, i cili tregoi se kanë biseduar dy herë me prindin.
“Prindi dy herë u lajmërua, njëherë prej Kurshumilisë ku ka qenë i arrestuam e ka telefonu vëllaun veç e ka njoftu që është i arrestuar, pastaj prej atij momenti deri ne ora 1 e 30 të natës saktësisht s’pe di orën e saktë e ka telefoni prej hetueseve, nga Kurshumlia janë duke më përcjell për Beograd, për momentin jena në rrugë e sipër thotë kanë mem que në Beograd, vëllau e ka pyet a je mirë me shëndet, e kanë shti me fol serbisht, ka thënë ai.
Arrestimi i të atit ishte befasi për të, pasi Mustafa thotë që babi i tij, në kohën për të cilën autoritetet serbe po pretendojnë se është bërë krimi ka qenë jashtë vendit.
“Jo nuk ka qenë, baba ka shkua për migrim në vitin 1997, 24 gusht 1997 ka dal për në Gjermani. Prej 1997 deri në vitin 2004 nuk ka mujt me ardhë në Kosovë. Jo nuk ka qenë në Kosovë gjatë kohës së luftës. Unë e shoh si me kanë naj qasje politike, si me ba të madhe këtë far pune, ai nuk ka të bëjë absolut me rastin që ata po pretendojnë, absolut nuk ka qenë në atë periudhë që akuzohet, ska të bëj me neve kjo farë punë. Ka udhëtu disa herë për Serbi por tash kohën e fundit ka udhëtu përmes bregdetit të Shqipërisë, këtë problem nuk e ka pas asnjëhereë, se ska pas pse me u frikësu se nuk ka qenë i akuzum, tregon Qamil Mustafa.
Ndërkohë, më 17 prill, autoritetet serbe e arrestuan shtetasin kosovar Sadik Duraku, i cili ka nënshtetësi britanike gjithashtu, nën dyshimet “për krime lufte” më 1999 – akuza që u hodhën poshtë nga familjarët e tij.
Duraku u arrestua në një vendkalim kufitar mes Kroacisë dhe Serbisë dhe një gjykatë serbe i caktoi masën e paraburgimit po atë muaj.
Familjarët e tij thonë se akuzat kundër Durakut nuk qëndrojnë, pasi ai, para luftës në vitin 1999, ka jetuar me familjen e tij në Angli.