Ministria e Punëve të Jashtme dhe e Diasporës e Kosovës i ka njoftuar shtetet e QUINT-it për arrestimin e shtetasit kosovar Tefik Mustafa nga autoritetet e Serbisë të shtunën mbrëma në Merdar.
MPJD-ja ka dënuar ashpër arrestimin e Mustafës dhe ka kërkuar lirimin e menjëhershëm të tij.
Po ashtu ka bërë të ditur se Zyra Ndërlidëshe e Republikës së Kosovës në Serbi menjëherë ka njoftuar misionet diplomatike të SHBA-së, Britanisë së Madhe dhe të shteteve tjera në Beograd si dhe ka dërguar kërkesë zyrtare te Zyra Ndërlidhëse e Serbisë në Kosovë për të marrë konfirmimin lidhur me arrestimin dhe po ashtu detaje për këtë.
“Ministria e Punëve të Jashtme dhe Diasporës dënon ashpër ndalimin, arrestimin dhe keqtrajtimin e qytetarëve të Republikës së Kosovës dhe njëkohësisht i bën thirrje Bashkësisë Ndërkombëtare që të ndërmarrë hapa konkret për lirimin e menjëhershëm të qytetarit z. Tefik Mustafa dhe njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut. MPJD për këtë arrestim ka njoftuar dhe shtetet e Kuint-it në Kosovë dhe do t’iu mbajë të informuar rreth këtij rasti dhe për çdo informatë të re do t’ju njoftojmë me kohë.
Njëkohësisht ftojmë të gjithë qytetarët që mund të ballafaqohen me vështirësi të natyrave të ndryshme gjatë udhëtimit të tyre nëpër Serbi, që të na kontaktojnë në numrin e telefonit: +383 46 51 00 51”, është thënë nga MPJD-ja.
Autoritetet serbe kanë thënë se Mustafa është arrestuar nën dyshime për krime lufte.
