Të premten pasdite është liruar nga burgi i Smrekonicës ish-deputeti i LDK-së, Gani Geci.
Geci ishte shpallur fajtor, pasi në gusht të vitit 2014, në Skenderaj, e kishte privuar nga jeta, Ruzhdi Shaqirin me të cilin kishte pasur një konflikt të mëhershëm.
Geci u dënua me 3 vite burgim për “Vrasje të rëndë”, kurse me 10 muaj burgim për “Armëmbajtje pa leje”. Ndaj tij u shqiptua dënimi unik prej 3 vite e 6 muaj burgim efektiv.
Geci sapo doli nga burgu në një prononcim për media kritikoi Partinë Demokratike të Kosovës dhe Lëvizjen Vetëvendosje.
“Ata që kanë nevojë për zgjedhje, janë munduar për me shku në zgjedhje. Unë nuk e di pse janë munduar votat i kanë pasur. Çka iu ka vy me shku në zgjedhje”, deklaroi ai.
Ndërkohë, i pyetur se a do të kandidojë për deputet në Kuvendin e Kosovës, ai thotë se do të kandidojë pas tri viteve.
“Jo, nuk kam mundësi, sepse nuk lejon ligji mbi zgjedhjet. Duhet mbi tri vite me pas pushim. Pas tri viteve, pse jo”.
Ndërkaq, sa i përket çështjes për zgjedhjet e reja dhe koalicionet e mundshme ai thotë se LVV dhe PDK kanë një brumë të njëjtë politik.
“LVV e PDK-ja a kanë nënë Lëvizjen Vetëvendosje. Ndërsa, Vjosa ka qenë është dhe do të mbetet e djathtë, kurrë askush s’ka me mujt me heq prej të djathtës. Një koalicion që Vjosa e ka bë me të majtën ka qenë koalicion i zorit”, deklaroi ai.
