“Fondi për subvencionimin e bizneseve start-up dhe bizneset e grave 2024” ishte sesioni informues i radhës që u mbajt në Komunën e Gjilanit.
I pari i kësaj komune, Alban Hyseni tha se fondi ka për qëllim zhvillimin e ekonomisë.
E për të janë ndarë 113 mijë euro.
“Unë kam dasht që fondi të jetë i orientuar nga fushat inovative dhe mbase edhe nga teknologjia, fonde të cilat po kërkohen këtë vit por jo në përjashtim edhe për gratë në zgjerim të biznesit, ku veçse i fuqizojmë bizneset që tanimë janë duke operu në komunën tonë. Janë mbi 50% e shoqërisë tonë që i përfaqësojnë gratë ndërkaq vitet e fundit kemi pasur shumë probleme të theksuara tek dhuna në familje apo tek vrasja e grave që njëra prej arsyejeve kryesore mund të jetë tek pavarësia e grave që mungon në shoqërinë tonë”, ka thënë Hyseni.
Falënderime patën edhe dy përfituese të subvencionit nga viti i kaluar, të cilat ishin pesimiste, por pas përfitimit të grantit nga komuna ato po vazhdojnë me biznes.
Kryetari ndër të tjera tha se do të ketë përkrahje direkte financiare për ndërmarrjet e të rinjve dhe fuqizimin e bashkëpunimit me sektorin e biznesit.
Ndërsa, nga zyra për përkrahjen e bizneseve treguan se ku mund të informohen të interesuarit për aplikim dhe se cilat janë kriteret.
Dokumenti duhet me qenë i plotësuar në kompjuterë dhe nuk lejohet plotësimi me dorë. Kriteret janë këto: me qenë në pronësi të grave sepse ky financim i kushtohet atyre dmth me qenë në 100% në pronësi të tyre, me qenë të regjistruara, me qenë në Komunën e Gjilanit”, u shpreh Vigan Azizi.
Ndryshe vitin e kaluar janë dhënë 135 mijë euro ku kanë përfituar 45 persona në Komunën e Gjilanit.