Në Gjykatën Themelore në Prishtinë, sot është mbajtur seanca për dy të akuzuarit për vrasjen e Lulzim Fejzullahut.
Avokati i familjes, Tomë Gashi ka thënë se njëri nga të akuzuarit është dënuar me 10 vite burgim, kurse tjetri me 9 vite.
Gashi ndaj vendimit për dënim me 9 vite ka paralajmëruar ankesë, kurse për tjetrin jo, sepse sipas avokatit, është dënuar në lartësinë maksimale që parashihet për veprën e kryer për të miturit.
“Ne mund të paraqesim ankesë për dënimin, vetëm për njërin prej atyre që është dënuar me 9 vite burg, ndërsa për tjetrin nuk mund të paraqesim ankesë, pasi fatkeqësisht ligji për të mitur është kështu – dënimi maksimal mund të jetë 10 vite dhe Gjykata ia ka dhënë 10 vite burgim…”, ka thënë Gashi para mediave.
Ndërsa, familja Fejzullahu nuk është ndarë e kënaqur dhe kanë shprehur mosbesim në drejtësi.
“Lulëzimi i ndjerë i ka pasur 18 vite. Kështu që s’ma plotëson mu zemrën – e para – dhe e dyta nuk i besoj shkurt e shqip kësaj drejtësie. Të më pyesësh pse nuk i beson, ky me mbiemër Artioli i ka pasur edhe 10 vepra më herët. Këtu nuk e di sa janë marrë parasysh. Këtu me një fjalë mua ma ka lënë varrën e hapur. Nuk i besoj kësaj drejtësie dhe pikë”, ka thënë Fejzullahu.
Ndryshe, Më 20 janar 2024, 18-vjeçari, L.F., ka vdekur në Qendrën Klinike Universitare të Kosovës në Prishtinë. /teve1.info/
