13 civilë që ishin vrarë 21 majin e vitit 1999 janë përkujtuar në 25 vjetorin e vrasjes së tyre në fshatin Stagovë të Kaçanikut. Aty morën pjesë familjarë, bashkëluftëtarë por edhe krerë komunal e përfaqësues të partive. Por se aty u vlerësua se me mungesën e ish-krerëve të UÇK-së në Hagë, përvjetore të tilla janë të zbehta.
Me intonimin e himnit kombëtar nisi ceremonia.
Pjesë e përkujtimit të Masakrës së Stagovës në Kaçanik ishin familjarë, bashkëluftëtarë e qytetarë të kësaj zone.
Në fjalën e tij, kryetari i Komunës Besim Ilazi tha se të gjithë të rënët janë krenaria e popullit.
“Sot 25 vite më vonë tregojmë historinë më të dashur, më të re të këtij vendi. Pra, bijtë dhe bijat e këtij vendi, të cilët jo që nuk e dashtën jetën, por më shumë e dashtën lirinë”, ka thënë ai.
Kreu i AAK-së Ramush Haradinaj deklaroi se duhet kujdesur që brezat e rinj te kenë njohuri për të kaluarën.
“I falënderoj të gjithë ata që kujdesën, qofshin prindër, qofshin edukatorë që luftën për liri, sakrificën, heroizmat e popullit tonë, dhimbjen tonë të asaj kohe e bartin nëpër breza, e bartin pra të fëmijët tanë “, ka thënë Haradinaj.
Madje ndau edhe dekoratën me Besim në Zot, Atdhe e Shtet për familjen e dëshmorit Ekrem Gudaqi, i cili u vra në këtë masakër.
Ky tregoi se pikërisht në ditën e rënies, familjes së tij iu shtua edhe një anëtar, nipi i dëshmorit.
Kurse nga Organizata e veteranëve të luftës theksuan mungesën e ish-krerëve të UÇK-së që ndodhen në Hagë.
“Ne kemi sot ndjenja të përziera, pasi bashkëluftëtarët tanë… sot padrejtësisht ndodhën në një betejë juridike që gjithsesi shpresojmë që do ta fitojnë “, ka thënë ai.
Manifestimi për të rënët e kësaj masakre vazhdoi edhe me programin artistik të përgatitur nga këshilli organizativ.
