Pa shumë bujë, Berat Gjimshiti ka ndërtuar karrierë të madhe në futboll. Mbrojtësi i qendrës tashmë është kapiten i Kombëtares së Shqipërisë dhe do t’i udhëheqë kuqezinjtë në fushë në “Euro 2024”.
Por fillimisht 31-vjeçari do ta udhëheqë Atalantan si kapiten në finalen e Ligës së Evropës.
Të mërkurën prej orës 21:00 në Dublin, Atalanta luan ndaj Bayer Leverkusenit në finale. Kapiteni i parë i Atalantas, Marten de Roon mungon për shkak të lëndimit. Dhe kështu përgjegjësia për ta udhëhequr skuadrën në fushë, me shiritin e kapitenit në krah, i takon mbrojtësit stabil shqiptar.
Gjimshiti është prej mbrojtësve të vlerësuar në Itali. Në vitin 2016 iu bashkua Atalantas nga Zuerichu zviceran. Kishte periudha huazimi tek Avellino e Benevento, ndërsa ka shumë vjet që është stabilizuar në përbërjen bazë të Atalantas.
“Na duhet që i gjithë ekipi të ndalë Leverkusenin, jo vetëm mbrojtja. Kjo është filozofia jonë: sulmojnë me dhjetë lojtarë, mbrohemi me dhjetë lojtarë. Kjo do të jetë shumë e rëndësishme nesër. Duhet të luajmë si një njësi”, ka thënë Gjimshiti në konferencën zyrtare për shtyp para finales, të martën.
Ai ka thënë se finalja e Ligës së Evropës është shumë e rëndësishme. Gjimshiti ka dy Kupa të Zvicrës me Zuerichun, ndërsa kërkon trofeun e parë me Atalantan. Trofeu i parë mund të jetë evropian.
“Duke hyrë në stadium e kemi kuptuar edhe më shumë rëndësinë e ndeshjes. Duke parë gazetarët çdo kund, atmosferën, të gjitha. Kemi luajtur çdo tri ditë për një kohë kështu që nuk kemi pasur shumë kohë të kuptojmë çka kemi arritur. Por tani është e qartë. Nuk mendoj se ka favorit. Do të luajmë lojën tonë dhe të shohim çka do të ndodhë”, ka shtuar Gjimshiti.
Ai thotë se Atalanta vazhdon të përmirësohet, ndonëse shumë lojtarë largohen e shumë të tjerë vijnë. Ka thënë se trajneri ka punuar shumë për të rritur nivelin e secilit lojtarë. Sipas Gjimshitit, edhe përvoja e Atalantas në Evropë ka ndihmuar skuadrën të rritet.
Për shkak të ecurisë së jashtëzakonshme, Leverkuseni ka më shumë vëmendje para finales. Por kjo vetëm mund të shkoi në favor të skuadrës italiane.
“Jemi të vetëdijshëm që po përballemi me një ekip të madh. E dimë që Leverkuseni është i pamposhtur dhe e dimë që ka pasur një edicion të mahnitshëm. Edhe rrugëtimi ynë ishte shumë i mirë. Kemi mposhtur ekipe të mëdha për të arritur në finale dhe kemi besim”, ka thënë trajneri i Atalantas, Gian Piero Gasperini.
Atalanta ka disa vjet që është prej skuadrave më të mira italiane. Kjo edhe për meritë të Gjimshitit.
