Mandati 7-vjeçar i kryeprokurorit aktual të Shtetit Aleksandër Lumezi do të përfundojë nesër.
Për këtë, Këshilli Prokurorial i Kosovës (KPK) ka shpallur një konkurs, në të cilin Blerim Isufaj është renditur i pari në garë për ta pasuar Lumezin, shkruan teve1.info
Sipas ligjit, kandidati që merr shumicën e votave dërgohet te presidenti i vendit për dekretim.
Ndonëse nesër është afati i fundit, presidentja e vendit Vjosa Osmani ende nuk e ka bërë emërimin për këtë pozitë. Ditë më parë, nga Presidenca kanë bërë të ditur se e para e shtetit është ende duke analizuar faktet dhe rrethanat që ndërlidhen me këtë proces.
Këshilltari për Media i Presidencës Bekim Kupina. sot në një përgjigje për teve1.info tha se presidentja Osmani po e trajton emërimin e kryeprokurorit të propozuar.
Kupina shtoi se stafi i presidentes ka filluar konsultimet dhe Osmani do të vazhdojë takimet në ditët në vijim.
“Në përputhje me kompetencat kushtetuese, Presidentja po e trajton emërimin e kryeprokurorit të propozuar. Do të kërkojmë dokumentacion shtesë sa i përket këtij propozimi, sikurse do t`i dëgjojmë të gjitha palët e përfshira në monitorimin e këtij procesi, përfshirë edhe partnerët ndërkombëtarë, të cilët tashmë i kanë paraqitur vërejtjet e tyre për këtë proces. Do të merren parasysh vërejtjet dhe pas trajtimit të hollësishëm, Presidentja do ta marrë një vendim. Stafi i Presidentes tashmë ka filluar këto konsultime, ndërkaq Presidentja do të vazhdojë takimet në ditët në vijim”, tha Kupina për teve1.info
Përfaqësuesit ndërkombëtar dhe shoqëria civile në Kosovë kanë kritikuar procesin e përzgjedhjes së kryeprokurorit të Shtetit.
Ata rekomanduan që i tërë procesi i përzgjedhjes dhe emërimit të anulohej dhe të përsëritej, në mënyrë që të evitoheshin shkeljet procedurale dhe defektet e evidentuara.
Lidhur me këtë, reagim pati edhe nga ambasadori amerikan Jeff Hovenier. Ai është shprehur se anëtarët e KPK-së nuk i kanë marrë parasysh ankesat legjitime dhe rekomandimet e panelit.
Por kritikat u hodhën poshtë nga Këshilli Prokurorial i Kosovës, i cili në reagimin për publikun tha se procesi i përzgjedhjes së kryeprokurorit të shtetit ishte plotësisht legjitim.
Në garën për kryeprokuror të shtetit ishin Armend Hamiti, prokuror në Prokurorinë e Prishtinës, Blerim Isufaj, kryeprokuror i Prokurorisë Speciale, Kujtim Munishi, kryeprokuror i Prokurorisë së Prishtinës, Lulzim Sulejmani, prokuror në zyrën e kryeprokurorit të shtetit dhe Shqipdon Fazliu prokuror në zyrën e kryeprokurorit të shtetit. /Teve1.info/
Autor: Bledë Krasniqi
