Mesfushori Toni Kroos do të tërhiqet nga futbolli aktiv pas Kampionatit Evropian që këtë verë do të mbahet në Gjermani.
Pensionimin e tij nga futbolli profesionist, e ka konfirmuar edhe vet Kroos nëpërmjet një postimi në rrjetet sociale të martën.
Ai ka bërë të ditur se ndeshjen e fundit me Real Madridin do ta luaj më 1 qershor kundër Borussia Dortmundit në kuadër të finales të Ligës së Kampionëve. Ndërsa, ka konfirmuar largimin nga futbolli pas “Euro 2024”, ngjarje në të cilën do ta përfaqësoj Gjermaninë.
Kroos prej vitit 2014 është pjesë e Real Madridit, ekip me të cilin ka fituar gjithçka që mund të fitohet në nivel klubesh. Krahas Realit, ai ka qenë pjesë edhe e Bayern Munchenit e Bayer Leverkusenit.
Për Kombëtaren e Gjermanisë, Kroos 34-vjeçar, ka regjistruar 108 paraqitje dhe ka shënuar 17 gola.
