Mesditën e sotme kanë filluar punimet që të zhbllokohet rruga Gjakovë-Klinë, e cila ishte bllokuar në mesnatë shkaku i shembjes së dheut.
Zëdhënësi i Policisë për rajonin e Pejës, Driton Rugova ka thënë për tëvë1.info, se rruga është duke vazhduar të jetë e pakalueshme, ku në vendngjarje është edhe kompania që është duke e larguar dheun.
Ndërkohë, ekipi i Tëvë1 ka dalë në vendin e ngjarjes, ku nga atje ka bërë të ditur se aty po qëndrojnë edhe disa nxënës që ishin në ekskursion. Të njëjtit kanë tentuar të kalojnë rrugën e bllokuar në këmbë, por që nuk janë lejuar për shkak të rrezikut që i kanoset.
“Policia ka dalë në vendngjarje, pra ku është shembur dheu në Volljakë, ku edhe janë duke u kryer punime”, tha Rugova./teve1.info/
