Në një konferencë për media, Bajrami theksoi se në shumë sektorë është përkeqësuar gjendja, teksa sipas saj, pagat kanë mbetur të njëjta, shkruan teve1.info
“Pavarësisht trumpetimeve të Qeverisë për rritje të pashembullt ekonomike, qytetarët e vendit tonë asnjëherë nuk kanë qenë në një pozitë më të vështirë e më të pashpresë së tani. Nuk ka artikull nga shporta e konsumatorit, artikuj bazë, çmimi i të cilëve nuk është dyfishuar vitin e fundit. Pagat kanë ngel të njëjta, derisa nuk ka përmirësim të shërbimeve, në fakt në shumë sektorë ka përkeqësim të gjendjes. Qytetarët tanë ndjehen të diskriminuar. Mjafton të kujtojmë konkursin e KEK-ut ku fitues dolën vetëm anëtarët e familjarëve të anëtarëve të Komisionit përzgjedhës si dhe eksponentë e familjarë të LVV-së”, tha Bajrami.
Bajrami u shpreh se ndihma prej 100 euro e Qeverisë për disa kategori të caktuara në vend, la jashtë të papunët.
“Në pakon 100 milionë euro ku Qeveria tenton të bëjë zgjidhje për krizën e shtresume ekonomike, la jashtë të papunët. Mos të harrojmë se numri i të papunëve është jashtëzakonisht i lartë dhe kjo kategori sociale nuk është në gjendje aspak të mirë ekonomike. Po tenton në shumën prej 100 euro faktikisht të ndihmojë të punësuarit në sektorin publik e privat”, shtoi ajo.
Tutje, deputetja Bajrami shtoi se ndihma prej 100 euro nuk do të ketë aspak ndikim në përmirësimin e jetës së qytetarëve, pasi siç thotë ajo, ajo se çka do të bëjë është të ndihmojë tregtarët të mirëmbajnë çmimet e larta edhe për një kohë. /Teve1.info/
