Kanë kaluar më shumë se një muaj kur Ministria e Arsimit ka shpallur konkurs për 33 inspektorë.
E kjo nuk është hera e parë që ky konkurs është shpallur.
Edhe dy herë të tjerë Ministria e Arsimit kishte tentuar të përzgjedh inspektorë por këto konkurse u anuluan.
E së fundmi, për 33 pozita kanë aplikuar 696 kandidatë.
Nga Ministria e Arsimit japin detaje për këtë konkurs.
“Për rrjedhën e atyre konkurseve dhe anulimin e tyre ka rekomandime nga Këshilli i Pavarur Mbikëqyrës për Shërbimin Civil të Kosovës. Konkursi është mbyllur me datë 05.05.2024 dhe MAShTI është në procesin e verifikimit paraprak për 696 aplikantë. Si MAShTI, jemi të përkushtuar që ky proces të përfundojë sipas hapave dhe afateve ligjore”, tha këshilltarja për media Edona Kutleshi – Maliqaj.
Nga Insituti Edguard po kërkojnë të përzgjidhen persona që janë meritorë për këto pozita të hapura.
“Konkursi për inspektorë tash po bëhet disa muaj që është rishpallë dhe është rikthyer me të drejtë dhe me arsyeje, valide të cilat besoj veç se janë prezantuar. Për tej kësaj është e rëndësishme që procesi të jetë meritokratike që për inspektorë të zgjidhën individë që më të vërtetë kanë kompetencë, që kanë përvojë të dëshmuar brenda komunitetin, dhe do ta bënin atë ndryshim e vërtete brenda inspektoratit”, thotë Qehaja.
E hapja e këtij konkursi po shihet se një vendim i duhur nga eksperti i arsimit, Argjend Osmani, por ai kërkon që ky numër të rritet më shumë.
“Menaxhimi i cilësi në fushën e arsimit është njëri nga parakushtet shumë e rëndësishme për rritjen e përgjithshme të cilësisë në këtë fushë. Andaj edhe rritja e numrit te numrit të inspektorëve do të kontribuoj në mënyrë pozitive në këtë proces. Nuk mund të them që kjo është e mjaftueshme por mund të them që është një hap shumë i qëlluar, duhet të shkuar në këtë drejtim që të rritet edhe më shumë numri i inspektoreve që të kemi një kontroll të cilës dhe të kemi mbikëqyrje me të suksesshme dhe efektive të mbarëvajtjes së punës në fushën e arsimit”, tha njohësi i arsimit, Argjend Osmsani.
Aktualisht numri i inspektorëve të arsimit është rreth 20.
Përmes këtij konkursi, në kryeqytet, pritet të shtohen 4 inspektorë, në Komunën e Mitrovicës 5, Ferizaj 7, Gjakovë 6, në Komunën e Pejës e të Gjilanit nga 4.
