Zëdhënësi i Lëvizjes Vetëvendosje, Arlind Manxhuka, ka reaguar pasi që Kosova mbeti jashtë rendit të ditës për votim në KiE.
Manxhuka thotë se sot u mor vendim i padrejtë ndaj Kosovës, e jo vetëm ndaj Qeverisë.
“Sot u mor një vendim i padrejtë ndaj Kosovës, jo vetëm Qeverisë. Siç tha ministrja Gërvalla, nuk kemi lënë gur pa lëvizur, gjithnjë përbrenda kushtetutshmërisë e ligjshmërisë, për interesin e Kosovës”, ka reaguar ai në Facebook.
Sipas zëdhënësit të VV-së, për të tejkaluar “ngërçin” politik, propozimet e tyre janë përbrenda Kushtetutës dhe jo atë që e kërkon Serbia.
“Propozimet tona për ta tejkaluar këtë ngërç siç ka thënë edhe Kryeministri janë përbrenda 3 shtyllave, pra përbrenda kushtetushmërisë dhe ligjeve aktuale. E Serbia kërkon diçka përtej tyre. Ajo po e kërkon 2013 dhe 2015, jo 2022 e as 2024”, ka shkruar ai.
Manxhuka ka reaguar edhe ndaj deklaratave të opozitës, duke thënë se janë personat e fundit që do të mund të ofronin zgjidhje.
“Ndërkaq, këta që po zhurmojnë sot, janë të fundit që do të mund të ofronin zgjidhje, meqë vetë janë pjesë e problemit që na përcjell nga viti 2013”, deklaroi ai./teve1.info/
