Në bashkëpunim të dy institucioneve nga Turqia dhe Shqipëria, me autor Abdullah Klinakun, u promovua libri “Kontributi i Turqisë për Kosovën – Pikëpamje nga Prishtina”.
Ky promovim u bë në Institutin “Junuz Emre” në Prishtinë, e cila u mundësua nga shtëpia botuese “ALASR” nga Tirana.
Në këtë ceremoni i pranishëm ishte edhe ambasadori turk, Tunc Angil.
“Sa më i madh të jetë trungu i një peme dhe sa më të gjera të jenë degët e saj, aq më të thella janë rrënjët. Një intelektual, politikan, akademik apo çfarëdo qoftë me profesion, nëse nuk është i mbështetur në rrënjët e veta, është i destinuar të kalbet”, tha ai.
Prezent në promovim ishte edhe kryetari i AAK-së, i cili theksoi kontributin e Turqisë në etapa të ndryshme për Kosovën.
“Turqia ishte përkrahëse e NATO-s me ndalë gjenocidin dhe atë se çfarë i ndodhte Kosovës. Njëkohësisht e kam përcjellë nga afër një angazhim të nivelit të madh të Turqisë për zhvillimin e jetës dhe fillimet e vështira me gjitha mekanizmat e vet. Në Kosovën e pasluftës, Republika e Turqisë, njihet si shteti më mbështetës në NATO. Dhe është shteti i vetëm që asnjëherë nuk na vendosi viza dhe nuk na ndaloi lëvizjen e lire”, tha ai.
Përmbajtja e këtij libri u vlerësua lartë nga panelistët.
