Kancelari gjerman, Olaf Scholz, presidenti i Francës, Emmanuel Macron dhe kryeministrja e Italisë, Giorgia Meloni i kanë dërguar letër kryeministrit të Kosovës, Albin Kurti, të mërkurën lidhur me rrugën e anëtarësimit të Kosovës në Këshillin e Evropës.
Për këtë letër, Gerald Knaus, nga Iniciativa Evropiane për Stabilitet, thotë se i është dërguar Kurtit para letrës që Qeveria e Kosovës ia ka dërguar KiE-së.
Knaus, ka theksuar se letra kishte për qëllim të tregonte rrugën më të mirë të zgjidhjes së çështjes së Asociacionit të Komunave me Shumicë Serbe.
“Kjo letër është dërguar para letrës së sotme nga qeveria e Kosovës, duke ofruar rrugën më të mirë drejt zgjidhjes së çështjes së Asocaicionit njëherë e përgjithmonë këtë maj. Është e qartë se çdo draft-statut i Asociacionit duhet të plotësojë kriteret e Këshillit të Evropës. Ajo që ofroi Kosova sot i plotëson ato dhe mund të dërgohet në Gjykatën Kushtetuese”, ka shkruar Knaus në X.
Tutje, ai theksoi se nuk duhet të plotësohet kërkesa e Serbisë për Asociacionin.
“Ideja në Beograd që Serbia duhet të miratojë çdo Asociacion do t’i jepte Serbisë një veto për përparimin e Kosovës dhe thjesht do të siguronte që asgjë nuk do të ndodhë kurrë. Gjë që natyrisht është ajo që liderët serbë thonë se duan: Kosova ‘kurrë nuk duhet të anëtarësohet’ në Këshillin e Evropës”, ka thënë Knaus./teve1.info/
